Baa mangko orang Pandai Sikek bagala?

Pandai Sikek adolah sabuah nagari dikaki Gunuang Singgalang dalam wilayah Kecamatan X Koto Kabupaten Tanah Datar- Sumatera Barat. Apobilo urang Pandai Sikek basuo di parantauan, ado ampek pertanyaan yang harus dijawek sekaligus. Partamo Sia namo ?, Apo Suku ?, Kamanakan Sia ? dan Gala apo nan bapakai ?.

Masalah “gala” nan dipikua umumnya oleh laki-laki di minang khususnyo di Pandai Sikek, sasuai jo pepatah urang tuo:

Pancaringek tumbuah di paga, Diambiak urang ka ambalau,Ketek banamo gadang bagala, Baitu adaik di Minangkabau.

Tantu awak akan mangatokan gala tu warisan nan diturunkan dari mamak ka kamanakan. Di mamak tu tantu dapek dari mamaknyo pulo. Masalahnyo lai katiko, mamak nan partamu mamakai gala tersebut apokoh memang mamakai gala tu karano jabatannyo?. Sebab, ado gala nan bisa dipakai oleh anak kamanakan suku Guci di Tanjuang Pandai Sikek , seperti : Rajo, Bagindo , Bandaharo, Sutan, Sidi dan Malin dan sebagainyo. Jadi tapikie apokoh dahulunyo Pandai Sikek sebuah kerajaan ?.  Sebab dalam pasambahan di Pandai Sikek disabuikan “nagari dibari barajo, luhak di bari bapangulu. guno nagari dibari barajo; sakik bakeh maimbaukan, mati bakeh marapuikan. guno luhak bari barajo; pai bakeh mangadu, pulang tampek babarito”. Sangat berbeda dengan disebutkan dari babarapo tambo minangkabau bahwa “ nagari bapanghulu, rantau barajo”. Ataukah ado pengaruh dari kerajaan-kerajaan Hindu seperti gala “Tiak Angso” yang disinyalir berasal dari kato “Tri Wangsa” sebelum masuknya  agamo Islam yang mempengaruhi dan memperkayo pulo tentang pembarian galo ko. Nan iko sadang dicari kabanarannyo.

Bilo gala diagiah oleh mamak ?

Sesuatu yang khas di Pandai Sikek ialah bahwa setiap laki-laki yang telah dianggap dewasa harus mempunyai gala, ukuran dewasa seorang laki-laki ditentukan apabilo alah barumah tanggo. Di Pandai Sikek pemberian gala dilakukan setelah akad nikah dirumah marapulai dengan sebuah acara pasambahan yang dimulai dari pihak bapak (sumando) kepada mamak rumah “ sebagai tando kapai anak kami mamakai nan sapanjang adaik, tantu baradaik pulo tantangannyo. manyo nan manjadi adaik nyo batatiangkan ayam singgang nan saikue, nasi kunyik nan sapiriang siriah nan di ateh, ameh nan dibawah, uang nan limo kupang namonyo . Acara tersebut dinamakan alek “makan singgang ayam” yang dihadiri oleh mamak pasukuan  , urang sumando (bapak) dan bapak dari pihak bako. Gala ikolah  nantinyo yang akan lebih populer daripado panggilan namonyo.

Pambarian galako manunjuakkan perbedaan antaro seorang laki-laki yang telah manikah dengan laki-laki yang belum manikah, katiko acara alek pernikahan sanak famili serta kawan samo gadang biasonyo tidak lupo mambarikan pertanyaan yaitu ” Apo Gala Sanak ? katiko dalam menghadiri undangan atau manjapuik marapulai.

Setiap kelompok orang saparuik yang disebut satu suku didalam sistim kekerabatan Minangkabau mempunyai gala pusako kaum sendiri yang diturunkan dari nikok kapado mamak dan dari mamak kapado kamanakannyo nan laki-laki. Gala ikolah yang diberikan sambut basambut kapado pemuda-pemuda sapasukuan yang akan berumah tanggo. Kareno itu pemberian gala untuk seorang pemuda yang akan kawin, harus dimintakan kapado mamaknyo atau saudara laki-laki dari pihak ibu.

Selain dari maambiak gala dari perbendaharaan suku yang ado dan telah dipakai oleh kaumnyo sejak dahulu, maka gala untuak seorang calon marapulai pria dengan persetujuan mamak-mamaknyo juo dapek diambiakkan dari pasukuan ayahnyo atau dari dalam istilah Minang disebut gala pusako dari bakonyo. Dan yang tidak mungkin atau sangat bertentangan dengan ketentuan adaik ialah mengambil gala dari pihak pasukuan calon isteri, Karano dengan demikian calon marapulai pria akan dikolai sebagai perkawinan orang sasuku.

Ketentuan untuk memberikan gala adaik kapado pemuda-pemuda yang baru kawin iko, tidak hanya harus berlaku dari rang sumando atau manantu-manantu yang memang berasal dari suku Minangkabau sajo, tetapi juga dapat diberikan kapado orang sumando atau manantu yang berasal dari suku lain. Kapado manantu orang Jawa, orang Sunda bahkan kapado manantu orang asing sekalipun. Karano gala seorang manantu sebenarnya lebih berguna untuk sebutan penghormatan dari pihak keluarga marapulai wanita kapado orang sumando dan manantunyo itu.

Gala yang diberikan kapado seorang pemuda yang akan kawin, tidak samo nilainya dengan gala yang harus disandang oleh seorang pangulu. Gala pangulu adolah warisan adaik yang hanya bisa diturunkan kapado kemenakannyo dalam suatu upacara besar dengan kesepakatan kaum setelah pangulu yang bersangkutan meninggal dunia. Tetapi gala untuk seorang laki-laki yang akan kawin dapat diberikan kapado siapa sajo tanpa suatu acara adaik yang khusus.

Ado ketentuan adaik yang tersendiri dalam menempatkan orang sumando dan manantu-manantu dari suku lain iko dalam struktur kekerabatan Minangkabau. Bagaimanapun para orang sumando iko, jika telah beristerikan perempuan Minang, maka mereka itu oleh pihak keluarga marapulai wanita ditagakkan samo tinggi dan diduduakkan samo randah dengan manantu dan orang sumandonyo nan lain. Karano itu kalau sudah diterima sebagai manantu, masuknya kedalam kekeluargaan juga harus ditetapkan secara kokoh dengan mengikuti ketentuan-ketentuan yang samo. Iko sesuai bunyi pepatah-petitih Minangkabau : “Jikok inggok mancangkam Jikok tabang basitumpu”  Artinya segala sesuatunya itu haruslah dilaksanakan secara sepenuh hati menurut ketentuan-ketentuan yang berlaku.

Nah, untuk sumando yang datang dari suku lain iko, pemberian gala juga tidak boleh diambilkan dari perbendaharaan gala yang ado dalam kaum nikok mamak marapulai wanita, Karano jatuhnya nanti juga jadi perkawinan sasuku. Tetapi dapat diambilkan dari perbendaharaan gala yang ado di keluarga ayah marapulai wanita atau disebut juga dari keluarga bako.

Atau bisa juga menurut prosedur yang agak berbelit yaitu calon manantu dijadikan anak kemenakan dulu oleh nikok mamak suku lain yang bukan suku marapulai wanita, kemudian nikok mamak suku yang lain iko memberikan gala adaik yang ado disukunya kapado calon orang sumando itu.

Pemberian gala untuk calon manantu ikolah, baik ia orang Minang maupun orang dari suku dan bangsa lain, yang wajib disebutkan pado waktu berlangsungnya sambah-manyambah dalam acara manjapuik marapulai. Hal iko ditanyokan oleh juru bicara rombongan calon marapulai pria yang menanti. Kemudian disebutkan pula secara resmi ditengah-tengah orang ramai setelah selesai acara akad nikah secara Islami. Ikolah yang disebut dalam pepatah petitih : Indak basuluah batang pisang,Basuluah bulan jo matoari,Bagalanggang mato rang banyak

Pengumuman gala marapulai pria secara resmi setelah selesai acara akad nikah iko sebaiknya disampaikan langsuang oleh nikok mamak keluarga marapulai pria.

Gala Kebesaran suku Guci

Gala kebesaran suku Guci di Tanjuang Pandai Sikek ado yang diawali dengan Datuak, Sutan, Sidi, Bagindo, Rajo, Rangkayo, Bandaro, Pakiah, Kari, Malin dan labai. Kecuali Gala Datuak Tumak Alam, semua gala iko dapat dipergantikan memakainyo tetapi tidak boleh dua orang sekaligus memakainyo.

  1. Gala yang menjadi pucuak bulek nan tinggi di anjuang nan gadang diamba adolah Datuak Tumak Alam yang arti galanya adolah “tumbuah nan mambusek dari bumi ( tumbuh muncul dari bumi) gala iko ado sejak Nagari Pandai Sikek ado.
  2. Kemudian ado sepuluh gala yang diawali dengan “Datuak” tetapi dia bukan pangulu. Orang yang menyandang gala iko biasanya mamak kepala waris yang tingkat pemahamannya samo dengan Panghulu pucuak bulek yang berfungsinya untuk baiyo-iyo bagi seorang pangulu bilo ado “kusuik kamanyalasaikan karuah nan kamanjaniahkan” atau timbul sebuah perkaro dalam pasukuan guci. Gala Datuak iko adolah : 1).Datuak Rajo Sampono, 2).Datuak Parpatiah, 3).Datuak Bareno, 4).Datuak Gindo Marajo, 5). Datuak Tiak Angso, 6). Datuak Garang, 7). Datuak Guci, 8).Datuak Simarajo, 9). Datuak Putiah, dan 10). Datuak Bungsu.
  3. Gala yang paliang disukai bagi kemenakan yang baru menikah adolah diawali dengan kata Ado 18 (delapan belas) gala Sutan, yakni : 1).Sutan Tumak Alam, gala iko adolah gala panungkek artinya siapa yang menyangdang gala iko berati dari “pariuak” nenek lelaki iko penganti Datuak Tumak Alam. 2).Sutan Rajo Sampono, 3).Sutan Sampono, 4).Sutan Parpatiah, 5).Sutan Bareno,. 6).Sutan Bandaro, 7).Sutan Bandaro Panjang, 8). Sutan Indo Marajo, 9). Sutan Tiak Angso, 10). Sutan Nagari, 11).Sutan Kalipah, 12) Sutan Sailan, 13). Sutan Majo Labiah, 14). Sutan Palembang, 15).Maraalam, 16). Sutan Rajo Alam, 17). Sutan Rangkayo Nan Gadang, 18). Sutan Rumah Panjang.
  4. Gala Sidi bagi kemenakan pilihan apabila gala Sutan habis dipakai oleh lelaki lain yang lebih dahulu manikah , ado  9 (Sembilan) gala Sidi yaitu : 1). Sidi Bandaro, 2). Sidi Malin, 3).Sidi Maraalam, 4), Sidi Parpatiah, 5). Sidi Sampono, 6). Sidi Marajo, 7).  Sidi Rumah Panjang, 8). Sidi Tiak Angso, 9).Sidi Palembang.
  5. Gala Rajo ado 5 (lima) pilihan, yakni : 1) Rajo Bandaro, 2).Rajo Sampono, 3).Rajo Alam, 4).Rajo Bujang, 5). Rajo Palembang.
  6. Gala Bagindo ado enam (enam) pilihan yakni : 1).Bagindo Maraalam, 2).Bagindo Sutan,3). Bagindo Pakiah, 4).Bagindo Malin, 5).Bagindo Katik. 6). Bagindo Marajo.
  7. Gala Rangkayo biasanya gala iko diberikan kapado kemenakan yang telah mempunyai usaha wirausaha. Gala Rangkayo hanya ado 3 (tiga pilhan), yakni : 1) Rangkayo Sutan, Rangkayo Mudo, Rangkayo Nan Gadang.
  8. Gala Bandaro hanya ado 2 (dua) pilhan , yakni : Bandaro Mudo dan Bandaro Sutan.
  9. Gala Pakiah diberikan kapado kemenakan yang latar belakangnyo sekolah `yang diangap mampu mempunyai ilmu Fiqih Islam. Gala Pakiah iko hanya ad 3 (tiga) pilihan, yakni 1).Pakiah Sampono, 2). Pakiah Bandaro, 3).Pakiaah Sutan.
  10. Gala Kari diberikan kapado kemenakan yang dianggap mampu hafalan Alquran nya dan pernah mengikuti MTQ atau bacaan al-qurannya bagus. Gala Kari hanya dua pilihan, yakni: Kari Sampono dan Kari Batuah.
  11. Gala Malin diberikan kapado kemenakan yang biasanya tamatan guru agamo, Gala malin ado 3 (tigo) pilihannyo:  1).Malin Pono, 2).Malin Marajo dan 3).Malin Putiah.
  12. Gala Labai diberikan kapado kemenakan yang latar belakangnyo sekolah agamo. Gala labai ado dua pilihan, yakni : 1), Labai Rumah Panjang dan 2),Labai Guci.

Pasambahan Makan Singgang Ayam

Sungguahpun kapado angku,ampun diminta kapado Allah,maaf dipinto bakeh nikoak mamak nan gadang basa batuah,iyo juo bak pituah rang tuo, kok tasabuik ambo di nan senteang nak dibilai kok kurang nak ditukuak.jikok nyo salah minta diasak ka nan bana,sipi nak dikatangahkan,kok tasabuik di nan bukan minta diasak ka nan iyo.kok lah iyo nan dalam pariyokan angku-angku nan baduo batigo. sambah ambo sambah baririk diparirikan diateh rumah gadang nangko. pulang pasambahan bakeh ipa bisan kami.

manyo ipa bisan kami. aratinyo lah pituah di nan tuo, sajak samulo rantiang bapatah , sumue bakali,aie basauak,pangulu badiri dalam nagari.jalan duo nan baturuik kato duo nan bapakai. kok dikaji jalan nan duo, partamu jalan adaik kaduo jalan syarak. mangaji kito sapanjang jalan adaik iyolah babarih babalabeh bacupak bagantang, basuri batauladan,bajanjang naiak batango turun. magaji kito sapanjang jalan syarak iyolah mangatahui iman,islam,tauhid,makrifah,sah jo bata,halal jo haram,sunaik jo paradu,haruih jo mukaruah. manyo kato nan duo,partamu kato buek,kaduo kato pusako. buek bana kadipakai pusako bana ka dirunggusi. lampisan kaji dalam nantun,nan lazim nyenyo adaik,nan bana nyenyo syarak,nan laku nyenyo kitabullah. balampiisan pulo kaji dalam nantun, bak pituah adis malayu; urang arih mangarek kuku,dikarek jo pisau sirauk,sirauik parauik batuangtuo.tuonyo elok kalantai. adaik nagari babilang suku,suku babilang buah paruik,itulah barih nan bapahek ,ico nan bapakai. mangko dinamokan urang nan salapan indu. nagari dibari barajo,luhak di bari bapangulu. guno nagari dibari barajo;sakik bakeh maimbaukan ,mati bakeh marapuikan. guno luhak bari barajo; pai bakeh mangadu,pulang tampek babarito. diateh gadang babingkah tanah basa balingkuang aue,supayo a itu,supayo nak maharuihkan sumando manyumando dari suku lain ka bagadang lain. di nan bak sakarang nangko,lah tumbuah sumando saparti wak kami karumah gadang nanko. sumando nangko balarauh pulo tantangannyo. a nyo nan manjadi larauhnyo,pihak nan tadaulu alah,nan takamudian lay. dipiihak nan tadaulu alah,baiak sahari duo hari,sapakan duo pakan,alah babulan bataun lambek maso nyo. dek Allah ta’ala mantakadiekan.lah manaruah baliau anak sikabaikan. anak si kabaikkan ko duo pulo wajah nan dikanduang nyo. partamu anak sikabaikan silaki laki,kaduo anak sikabaikan si parampuan. bagombak limo. kaganti cincin dikalingkiang kaganti ameh dalam puro, pamenan ibu jo baponyo,cahayo kampuang jo hilaman. paga nagari sumarak tapian.kok tingginyo lah bak ditambak,gadangnyo lah bak di anjuang itulah manko diambiak sariak dirancuang talang,talang bak raso kabaungo. dari ketek di nanti gadang,gadang lah tau ereang jo gendeang,lah tau malu jo raso ,tau di raso jo pareso,lah tau di manih aie tabu,tau dipakek tangguli. tau mamahek jo maukie,tau dirancak ragi bungo.tau di awa jo akie pakarajaan nangko, iyo lah biaso nan kadijapuik ka dijangkau urang nan kamamakai nan sapanjang adaik. tumbuah di anak sikabaikan si parampuan baitupulolah tantangannyo, ketek dibaok kapancuran/kasumue,di aja mandi,di asok ,di asuah,dibari makan,dibari baambuik panjang. kaganti cincin dikalingkiang kaganti ameh dalam puro, pamenan ibu jo baponyo,cahayo kampuang jo hilaman. limpapeh rumah gadang. kok tingginyo lah bak ditambak,gadangnyo lah bak di anjuang itulah manko diambiak sariak dirancuang talang,talang bak raso kabaungo. dari ketek di nanti gadang,gadang lah tau ereang jo gendeang,lah tau malu j raso ,tau di raso jo pareso, tau di awa jo akie pakarajaan nangko. iyo lah nan biaso kadijapuikan kadijangkaukan urang nan kamandirikan nan sapanjang adaik. di nan bak sakarang nangko,lah tumbuah dikami anak sikabaikan si laki laki. iyolah nan ka dijapuik kadijangkau urang,nan kamakai nan sapanjang adaik. itu la mangko bapisuruah kami kabakeh anak kami bacapek kaki baringan tangan. manuruik labuah nan panjang,jalan nan baliku.jauah nan baturik,ampie bajalang,manjalang rumah nikoak mamak nan gadang basa batuah. sarato kito nan adir diateh rumah gadang nangko. baiak lah adie kito ditangah rumah gadang nangko bakaranolah kapai anak kami mamakai nan sapanjang adaik,tantu baradaik pulo tantangannyo. manyo nan manjadi adaik nyo batatiangkan ayam singgang nan saikue,nasi kunyik nan sapiriang siriah nan di ateh,ameh nan dibawah,uang nan limo kupang namonyo. kok lah banamo bana kabanaran nan katangah dikami nan ditarimo suko jikok banamo dilua nak dikadalamkan. sakian sambah jo titah kami himpunkan

(mamak) Lah sampai di bapak kami.. Sapanjang panitahan bapak kami nan tairik tabantang,talayang ditangah tangah,tibo bakeh kami sagaji ipa bisan. Jikok didanga lah elok bunyi,di pandang lah elok rupo. Lah bunta bak sawah nan sapiriang,lah boneh bak padi nan satangkai….tapi samantang pun baitu. Dek sawah indak sapiriang,dek pipik indak saikua. Dek padi indak satangkai masak indak sakali ambiak,dek pipik indak saikua tabang indak sakali inggok. Baa dek kaadaan kami duduak baduo batigo nan sagalo ipa bisan,dihadapan nikoak dengan mamak. Kok kami cubo marantang panjang,untuang taserak jalo suto,kok lai ikan nan kabuliah,kok indak ameh tantangannyo. Kok kami cubo mampaiyo patidokan,dikato nan kamanjawek,di gayuang nan kamanyambuik,lai kok dalam adat nan tapakai….. Nak bapambari bapak kami….

(bapak) sampai di mamak kami,arati nyo bana nan katangah dimamak kami.bana nan katangah jikok dipandang lah elok rupo didanga lah rancak bunyi.baa pulokoh dikato kamanjawab digayuang kamanjawek,dek bakarano kami nan baduo batigo sakaji ipa bisan nan duduak di hadapan jumlah nikoak mamak nan gadang basa batuah tantu batariak bakato bariyo batido.yo mantun? Sapanjang kabanaran mamak kami nan katangah lah dalam adaik nan tapakai lah dalam barih jo balabeh lah dalam cupak jo gantang nyenyo kami.lalunyo dalam nantun,karano itu pituah dinan tuo,barih nak jan ilang,adaik nak nyo tapakai.adaik bajalan bamulah adaik bakato bariyo.sakarang jalan kadipamulahkan kato ka dipariyokan dek mamak kami.kok dekami lah dalam garih nan barantang.bana bananti dikami.kumbali sambah bakeh mamak kami.

(Mamak) Yo…ma bapak kami…..sapanjang rundiang nan kami danga,karana bakato ka pariyokan,bajalan ka di pamulahkan dek bapak kami…., Kok janyo kami lah tibo di barih balabehnyo,iyo lah dalam adaik nan tapakai,kan baitu kabanaran bapak kami……… Dikami sakaji ipa bisan itu bana nan manyangkuik. Baa karano lah dalam adaik nan tapakai kabanaran kami…kok di kami hari elok nak tapakai,kok bajalan kami pamulahkan,bakato kami pariyokan…..sipaik mananti bapak kami.

(Bapak) indak tarago baulang sapanjang buah kabanaran nan katangah dek mamak kami.kok dek kami bana badangakan.kumbali bakek mamak kami.

(mamak) Inya Allah kami pariyokan…….

(bapak) Bana mananti

(mamak ka angku datuak) Bakeh angku sambah.aratinyo karano lah katangah kabanaran bapak kito,adaik nan biaso pituah dinan tuo,suato kato takanak jawek suatu gayuang takanak sambuik.nan dijuluak nak rareh nan dipungkang nak jatuah.tumbuah bak dinan sakarang nangko,karano lah katangah kabanaran bapak kito,lah bana kok dikami kato kabajawek gayuang kabasambuik ikobanalah pai nan kami tanyo pulang nan kami baritokan bakeh nikoak mamak nan gadang basa batuah. Ko lah bana nyenyo angku nak bapambari angku,kok banamo balun nak di kadalamkan sakian sambah bakeh angku.

(Datuak ka mamak) Manyo sutan,aratinyo bana nan katangah dek sutan tumbuah bak dinan sakarang nangko,karano lah katangah kabanaran bapak kito,lah bana kok dikami kato kabajawek gayuang kabasambuik ikobanalah pai nan kami tanyo pulang nan kami baritokan bakeh nikoak mamak nan gadang basa batuah.yo baitu?

(sutan) bana …

(Datuak) Sapanjang kabanaran sutan lah ico nan baturuik lah adaik nan bapakai,lalunyo dalam nantun pai batanyokan pulang bakadukan .tumbuah dinan bak sakarang kiko karano lah tajun sambah jo titah di bapak kito,kato tantu bajawek gayuang tantu basambuik,nan di pungkang nak jatuah nan di juluak nak nak rareh.kandak babari pintak balaku.namun dalam sado nantun,barih nak jan nyo hilang jajak nak jan nyo lipue.adaik bakatobariyo adaik bajalan bamulah.alahkoh bajalan bapamulahkan bakato bapariyokan di sutan nan baduo tigo.kok nyenyo ambo,bananti jan baabih hari batanggang jan baabih minyak lah bana nyo kato bajawek gayuang basambuik.sakian titah kumbali bakeh sutan.

(sutan) sapanjang pambarian angku satitiak jadikan lauik basa sakapa jadikan gunuang tinggi,bapacik arek baganggam taguah siang dipatungkek malam jadikan suluah.

(Sutan ka sidi) manyo sidi,aratinyo karano lah tajun sambah jo titah dek bapak kito.tantu suatu kato bakandak jawek suatu gayuang bakandak sambuik.adopun maso sabalunnyo,pailah kami batanyokan pulang lah bakadukan ka nikoak mamak nan gadang basa batuah.dek nikoak mamak baalam laweh bapadang lapang,indak tarago bananti hari lah bapambari nikoak mamak.a nyo nan jadi pambari nikoak mamak.lah bananyo kato bajawek gayuang basambuik.samantangpun baitu barih nak jan nyo ilang jajak jan lipue.adaik bajalan bamulah adaik bakato bariyo.sakarang jalan nan kadipamulahkan kato nan kadipariyokan bakeh sidi.dimakoh katarabiknyo bak padi katumbuahnyo bak bijo dikato nan kamanjawek digayuang kamanyambuik kabanaran bapak kito nan katangah.ikolah jalan nan bapamulahkan kato nan bapariyokan bakeh sidi,sakian sambah

(Sidi ka sutan) sampai dek sutan.aratinyo bana nan katangah dek sutan karano lah tajun sambah jo titah dek bapak kito.tantu suatu kato bakandak jawek suatu gayuang bakandak sambuik.adopun maso sabalunnyo,tinggi alah bajuluak randah lah bajambo.painyo kami tanyokan pulang lah kadukan ka nikoak mamak nan gadang basa batuah.dek nikoak mamak baalam laweh bapadang lapang,indak tarago bananti hari lah bapambari nikoak mamak.a nyo nan jadi pambari nikoak mamak.lah bananyo kato bajawek gayuang basambuik.samantangpun baitu barih nak jan nyo ilang jajak jan lipue.adaik bajalan bamulah adaik bakato bariyo.sakarang jalan nan kadipamulahkan kato nan kadipariyokan bakeh sidi.dimakoh katarabiknyo bak padi katumbuahnyo bak bijo dikato nan kamanjawek digayuang kamanyambuik kabanaran bapak kito nan katangah.ikolah jalan nan bapamulahkan kato nan bapariyokan bakeh sidi,iyo baitu?

(sutan) bana

(sidi) sapnjang kabanaran sutan lah dalam barih jo balabeh lah dalam cupak nan jo gantang,lalunyo dalam nantun.bajalan bapariyokan bajalan bapamulahkan.jalan nan tapariyokan di sutan batarimo suko di ambo.baa pulokoh,dek ambo nan duduak sabalah kamari lai baduo batigo pulo.kok batariak dikami bajalan bamulah bakato bariyo lai koh di sutan ka babari.kumbalai bakeh sutan.

(sutan) Aratinyo buah kabanaran sidi kiko nantun jalan nan tapariyokan di sutan batarimo suko di ambo.baa pulokoh,dek ambo nan duduak sabalah kamari lai baduo batigo pulo.kok batariak dikami bajalan bamulah bakato bariyo lai koh di sutan ka babari.iyo baitu?

(sidi) bana

(sutan) sapanjang kabanaran sidi lah dalam takuak tabang tibo,lah dalam garih makanan pahek.lalunyo dalam nantun.karano uitu pituah rang tuo,barih jan hilang jajak jan lipue.adaik bakato bariyo adaik bajalan bamulah.sakarang kato kabapariyokan jalan kadipamulahkan dek sidi.kok diambo bana bananti.

(sidi) .aratinyo bana nan katangak dek sutan karano uitu pituah rang tuo,barih jan hilang jajak jan lipue.adaik bakato bariyo adaik bajalan bamulah.sakarang kato kabapariyokan jalan kadipamulahkan dek sidi,kok di kami bana mananti.yo baitu

(sutan)bana

(sidi) ndak tarago baulang sapanjang pambarian sutan,bana bapariyokan.

(bana bananti)

(sidi ka rangkayo) rang kayo,aratinyo karano bisiak lah kadangaran himbau lah kalampauan di dunsanak kito sabalah ka mudiak.karano lah tajun sambah jo titah di bapak kito.tantu kato bajawek gayuang basambuik.sakarang dimakoh katarabiknyo nan bak padi katumbuahnyo nan bak bijo dikato nan kamanjawek gayuang kamanyambuik kabanaran bapak kito nan katangah.ikolah jalan nan bapamulahkan kato nan bapariyokan bakeh rangkayo.

(rangkayo ka sidi) sampai dek sidi.aratinyo karano bisiak lah kadangaran himbau lah kalampauan di dunsanak kito sabalah ka mudiak.karano lah tajun sambah jo titah di bapak kito.tantu kato bajawek gayuang basambuik.sakarang dimakoh katarabiknyo nan bak padi katumbuahnyo nan bak bijo dikato nan kamanjawek gayuang kamanyambuik kabanaran bapak kito nan katangah.ikolah jalan nan bapamulahkan kato nan bapariyokan bakeh rangkayo.yo baitu?

(sidi) bana

(rangkayo ka sidi) rupo ruponyo di sidi barih nan ndak hilang jajak ndak lipue.lalunyo dalam nantun,bajalan bapamulahkan bakato bapariyokan.jalan nan tapamulahkan kato nan tapariyokan dek sidi batarimo suko diambo.di tantangan kato nan kamanjawek gayuang nan kamanyambuik kabanaran bapak nan katangah .nak lamak siriah lega carano lamak kato lega bunyi, dikato nan kamanjawek kumbali kapado sutan,pihak mangumbalikan kumbali ka sidi .nan kami disiko lah samo didalam.sakian sambah.

(sidi ka rangkayo) Alah sampai dek kayo?

(rangkayo) umpamo alah

(sidi ka rangkayo) Aratinyo nan manjadi buah bana di kayo kiko nantun di tantangan kato nan kamanjawek gayuang nan kamanyambuik kabanaran bapak nan katangah .nak lamak siriah lega carano lamak kato lega bunyi, dikato nan kamanjawek kumbali kapado sutan,pihak mangumbalikan kumbali ka sidi .nan kami disiko lah samo didalam.iyo baitu?

(rangkayo) lah bananyoh

(sidi ka rangkayo) sapanjang kabanaran sidi lah rancak susunnyo nan bak siriah lah rancak ririknyo nan bak pinang. nak lamak siriah lega carano lamak kato lega bunyi, dikato nan kamanjawek kumbali kapado sutan.kok di ambo bana bakumbalikan.

(sidi ka sutan) manyo sutan

(sutan) manitahlah

(sidi ka sutan) aratinyo parundiangan kito antaro jo sutan iyolah talaun talalai.talaunnyo tarago kabukik mancari angin ,kalurah mancari aie.dek hari kolah nan elok kutiko kolah nan baiak,lakeh dapek dikami bulek nan sagiliang pipiah nan satapiak.dibulekkan aie ka pambuluah dibulekan kato ka mupakaik.a nyo nan manjadi mupakaik kami nan sabalah kamari,dipihak kamanarabik an nan bak padi manumbuahkan bak bijo,dikato nan kamanjawek di gayuang kamanyambuik kabanaran bapak nan katangah iyolah karano lah sutan nan baulu jawek di sutan pulo katarabiknyo.kumbali bakeh sutan.

(sutan ka sidi) aratinyo sapanjang titah nan katangah dek sidi..dek hari kolah nan elok kutiko kolah nan baiak,lakeh dapek dikami bulek nan sagiliang pipiah nan satapiak.dibulekkan aie ka pambuluah dibulekan kato ka mupakaik.a nyo nan manjadi mupakaik kami nan sabalah kamari,dipihak kamanarabik an nan bak padi manumbuahkan bak bijo,dikato nan kamanjawek di gayuang kamanyambuik kabanaran bapak nan katanggah iyolah karano lah sutan nan baulu jawek di sutan pulo katarabiknyo.iyo baitu?

(sidi) bana

sutan ka sidi) sapanjang kabanaran sidi mambanai ambo.,dipihak nan baulu jawek iyolah diambo. namun sakiro nantun,nak rancak lega carano nak elok lega bunyi.elok juolah di sidi nan kamanarabik an.kumbali bakeh sidi.

(sidi ka sutan)aratinyo nan manjadi bana dek sutan,nak rancak lega carano nak elok lega bunyi.elok juolah di sidi nan kamanarabik an.ityo baitu?

(sutan)bana

(Sidi ka sutan) sapanjang kabanaran sutan lah dalam takuak tabang tibo,lah dalam garih makanan pahek,lalunyo dalam nantun nak rancak lega carano nak elok lega bunyi mambanai ambo.namun sakiro nantun,bak pituah urang tuo.adaik bajalan ba nan tau adaik bakato ba nan pandai.tarabik an lah dek sutan mairiangan ambo.sakian sambah.

(sutan ka sidi) aratinyo nan manjadi buah ban dek sidi,nak rancak lega carano nak elok lega bunyi mambanai ambo.namun sakiro nantun,bak pituah urang tuo.adaik bajalan ba nan tau adaik bakato ba nan pandai.tarabik an lah dek sutan mairiangan ambo,yo baitu.

(sidi) sakiro nantun

(sutan) sapanjang kabanaran sidi lah dalam barih jo balabeh lah dalam lingkuang cupak jo gantang.lalunyo dalam nan tun.bak gurindam rang tuo. singgalang lereang malereang dilereang nagari pandaisikek mandaki jalan ka tanjuang tasabuik nagari ampek koto dipapanjang namuah panjang elok di kumpa nak nyo singkek nan bak maetong kain saruang disinan juo katibonyo. karano lah sapareh tu bana sidi mangumbalikan bakeh ambo.kok jadih jadih juo.namun sakiro nantun,kok senteang nak di bilai kurang yo batukuak dek sidi.

(sidi) indak bapabia tagamang sutan

Saiful Guci Dt.Rajo Sampono- 7 Mei 2021